بهاء الطائي… كلشي هم

بهاء الطائي

كلشي هم

الليل هم

الناس هم

الغربة هم

الضحكة إلى ما تلكه العيون التلمها تصير هم

ينجفي الماي ويغير بعينها وتبرى الذمم

ويخلص الليل بصور كل شذرة بيها اعله الوفه مشابك وشم..

هاي موش أول محطة اليختنك بيها الغريب

ولاهي أول طيحة إجتاف الحزن فوك الصليب،

يا شوارع للصبر وديلي نسمة

ياشوارع ليلهم حزني البعيد

وشوكهم صايرلي لجمة،

كبرن روازين حزني اعله الدمع وانه غريب

ومالكيت البيه مهب ويصير خلي

ولا لكيت الينجفي مراية اعله ظلي!

ياشوارع جا بعد بالحيل شلي؟

تلمستهم لجمة بأطراف اليسار

وجنت أظن بيهم سعد،

ودورتهم جلمة بشفاف القطار

ومالكيت الهم نشد

آه يشباج الغريب الماعثر بيك الورد

ولا خلك نسمة اعله ضوياتك تصد

كود روحك وانتجي اعله ذنوبهم لآخر عكد،

صوغ كل شوغة اعله جيدك وانتشي من أول حزن

ودوف سكرك بالشمس خمرة وغصب بيها اندفن

آه يشباج الغريب الماغمض بيك الجفن.

عازة اليبعد وزة يشم السراكي

وينجفي أعتاب اعله حيله

وانه جم باب انجفيله!

جنت اظن بشوكهم كمرة وجدايلهم مهب

وجنت أظن الخير يتدهده ويشح بيه العتب

مامحسب أعثر بأول محط

ولا محسب للسوالف تندفن ذكرى بجنط

ها يزرع أيدي المشيت شوهدناك وي الكحط؟!

ياما شكت زيجها اعليك الرسايل

وياما صاحت وانتخت بيك الجدايل.

وانت لاطيفك يمر وانطر تجي

ولادمع صدفة ويفز بيك البجي

هلا ؟ يزرع أيدي وبعد عندي حجي.. الخ

بهاء