طراطيش عامل ميكانيك – شيركو ماربين : امنين أجيك يا شعب !؟

17-5F

جريدة اليسار العراقي – العدد (17) – أعمدة الجريدة

تدرون الانتخابات قربت لو هم ماتدرون؟
لان احنا تعودنا على اسطوانة ما ادري… ما يخصني… اني شعلية…!!!
شوفوا يا جماعة الخير
انصحكم نصيحة عليكم العباس انتخبوا نفس الحرامية واللي اشتركوا بقتل شبابنا بمجزرة اسبايكر …!!!
وانتو تعرفون كلش زين منو اللي چان ورا اسبايكر ..
عليكم الحسن والحسين انتخبوا نفس هذوله اللي دمرو العراق وشعبه… وخلو امهاتنا يدورون بالزبالة علمود يعيشون ويعيشون اولادهم…
منين اجيكم ومن اطلعلكم ..؟
اگللكم اذا وزعوا عليكم بطانيات وصوبات ونفطات …بربكم مراح تنتخبوهم؟
هم راح نروح ركض وننتخبهم لان بيها صوبات وچم دولار امريكي… اخ من الدولار وصاحب الدولار؟
شلون دمروا بلدنا هذولة اللي اجونا باسم الدسيمقراطية ؟وجابولنة حفنة حرامية !!
ملاعين الامريكان ربوهم ودربوهم مثل العتوي مال المطبخ ما يجوز من بوگ الشحمة من المطبخ …اشلون تعلوم ؟
بس مع ذلك انصحكم انتخبوا العتاوي نفسهم..
لان اني بعدني ماتعلمت من عمري 15 سنة اللي راح وياهم وبعدني ما متعلم عليهم ..!
ابربكم انتخبوهم عسى وأن يتعدلون ويصيرون اوادم ..!
بس اخ من ذيل الچلب شيعدلة ما تکلوولي شيعدلة؟
خلاصة الحچي ..اني اشوفن هاي فرصتنا الاخيرة يا شعبنا ! ولو تصيب لو تخيب ؟
ها شتكولون ؟
اخ من الچاي بس اريد اسكت الواوي اللي براسي وافتهم منكم وين رايحين وين جايين .
اشوف اطفالي وماعندي اشتريلهم شي ورضيهم من وره هذولة اللي باكو البلد او باكو النفطات واحنا ساكتين ..!
عمي باكونا كلنا ميخالف ..! وكتلونا كلنا ميخالف ..! هجرونا كلنا ميخالف ّ..! شردونة كلنا ميخالف…! هجمو بيوتنا على روسنا كلنا ميخالف ….!
ماتگلولي اشوكت يخالف ؟مو كافي ميخالف ..!!! بس مرة بحياتكم گولوا لا يخالف وبعد ما ننتخبكم ..يخالف. ..يخالف …يخالف !!!
ولو مرة وحدة بس بحياتكم عليكم العباس!!!